Padayon ang rehabilitasyon sa Tabuelan human sa 6.9 magnitude nga linog pinaagi sa mga programa sa Cebu Provincial Government nga gipangulohan ni People’s Governor Pam Baricuatro sa Barangay Poblacion, Tabuelan, Cebu niadtong Hunyo 18, 2026.
Atol sa kalihokan nga gihimo sa Tabuelan Astrodome, gipanghatag ang calamity assistance ug agri-fishery inputs aron matabangan ang mga pamilya, mag-uuma, ug mangingisda nga naapektuhan sa kalamidad.
Mipasalig usab si Gov. Pam og Php10 milyon nga pondo alang sa rehabilitasyon sa tulo ka Rural Health Units sa Barangay Maravilla, Kantubaon, ug Bongon aron masiguro ang padayon ug luwas nga serbisyo sa panglawas alang sa mga residente sa Tabuelan.
Nagpadayon usab ang Cebu Provincial Government sa paghatag og suporta sa sektor sa agrikultura ug pangisdaan aron mapalig-on pag-usab ang produksyon sa pagkaon ug matabangan ang mga komunidad nga makasugod pag-usab sa ilang tinubdan sa kita.