Gamit han dara nga nga eco bag, pira nga mga tinda an gin-shoplift han usa nga kawatan ha usa nga convenience store ha Brgy. 53, Real Street, Tacloban City.
Ginkilala an tagreklamo nga hi alyas “Bem,” 31-anyos nga store manager, single, ngan residente han Tacloban City.
An suspek naman in ginkilala ha alyas nga “Se,” 37-anyos, mayada live-in partner, waray trabaho, ngan residente han Brgy. 68, Anibong, Tacloban City.
Nagawas ha imbestigasyon han mga otoridad nga sumakob an suspek ha establisyemento banda alas 6:40 han kulop han mao nga adlaw ngan kasuspetsa petsado na an gin aakto.
Pumurot ini hin pira nga item ha mga estante ngan ginsulod ha iya dara nga green nga eco bag samtang pauro-utro nga nagsisiniplat ha palibot, nga nagduso ha security personnel nga hi alyas “Yan,” 39-anyos, nga bantayan an iya ginbubuhat. Mahuman in pumakadto an suspek ha exit nga waray pagkakadto ha kahera. Tungod hini, ginpugngan hiya han security ngan gin-aruan hin proof of payment han iya mga dara nga item, pero waray ini may napresentar.
Han pagkakaptan na hiya han security guard para han dugang nga pag-verify, tigda la nga pumalagiw an suspek tikang ha tindahan.
Mahuman an paglanat, malinampuson ini nga nadakop. Narekober tikang ha suspek an dara nga eco bag nga mayada sulod nga grocery items nga nasumatutal nakantidad hin P5,382. Lakip dinhi an tulo (3) ka piraso hin Frabelle Foods Pusit, lima (5) ka piraso hin Frabelle Foods Dilis, siyam (9) ka piraso hin Cebu dried Mango, tulo (3) nga Daily Fix Cranberry Yogurt, pito (7) ka piraso hin Daily Fix Almond & Dark Chocolate, ngan tulo (3) ka Daily Fix Nuty and Nice.
Naaresto naman an suspek ngan gindara lakip an mga narekober nga ebidensya ha San Jose Police Station 1 para han sakto nga disposisyon.
Source: RMN Tacloban