ILOILO — Wala mabayaran sang Department of Public Works and Highways (DPWH) 6 ang duta nga ginatindugan sang dalan sang Iloilo Sunset Boulevard nga sakop sang Cagbang, Oton.
Ini ang nagtulod sa tag-iya nga si Roel Amara nga pasiraduhan ang dalan subong nga adlaw.
Suno kay Amara, 2022 nag-contact ang taga-DWPH 6 sa iya nga sa iya duta nila paagyon ang Iloilo Sunset Boulevard.
Pero wala madayon ang pagbakal sang duta tungod wala pa sang pondo.
Sa pihak sini, ginpasugtan lang ni Amara ang DPWH nga makaagi sa iya duta agud makasugod sila sang construction sa iban nga parte sang dalan tungod didto lang sila maka-access.
Enero 2025 nag-contact si former DPWH 6 Regional Director Engr. Sanny Boy Oropel kay Amara kon puwede na sila makasugod obra sa iya propiedad pero wala pa sila sang pondo.
Tungod na-intiendihan man niya nga kinahanglan na masuguran ang proyekto, nagpasugot ang tag-iya sa kondisyon nga bayaran sang DPWH ang bili sang iya duta sang Disyembre 31, 2025.
Nahisugtan nga baklon sang DPWH ang porsyon sang iya duta nga paagyan sang Sunset Boulevard sa balor nga P28 million.
Sa kabug-usan 10,600 sqm ang duta ni Amara kag 4,400 sqm diri ang ginbakal sang DPWH.
Suno kay Amara, nagligad na ang Disyembre 31, 2025 pero wala gihapon mabayaran sang DPWH ang duta.
Ginpabutyag ni Amara nga wala man siya nagkulang sa pagpahanumdom kag nagasabat man ang DPWH, nga nagsiling nga gina-prioritize nila ang pag-request sang budget pero wala pa gihapon nag-abot.
Pag-lapse sang deadline kag tungod nagbag-o na ang nagadumala sa DPWH6, nagpakig-angut man ang tag-iya sa ila kag nagasabat man.
Personal nga naka-istoryahanay si Amara kag Assistant Regional Director Engr. Ricardo Gutierrez nga nagsiling yara na ang pondo pero wala mapaathag kon san-o siya bayran.
Ginhatagan ni Amara sang extension nga 60 days ang DPWH 6 halin Marso 3 pero wala gid siya mabayaran.
Ginpabutyag ni Amara nga na-intiendihan niya ang huol sa mga motorista pero tungod wala siya mabayaran bisan pa naghatag na siya sang extension.
Note: Bug-os nga karsada (inbound kag outbound) ang ginpasiraduhan sang tag-iya tungod sakup diri ang iya duta nga wala pa mabayran sang DPWH.