Habang padagos an implementasyon kan TBTP, mas lalong nagtatao nin oportunidad asin kaaraman sa mga aki asin sa mga magurang na kalahok sa paagi kan dedikasyon kan mga tutors asin Youth Development Workers (YDW) na pirming naghihimo nin marhay na pagpaplano asin maayos na pagpapadaloy kan kada sesyon.
Kabali man sa mas pinakusog na implementasyon kan Tara, Basa! an regular na monitoring na ginagibo kaiba an TBTP focals asin shadow teachers hale sa Department of Education (DepEd), na siyang nagtatao nin gabay sa aldaw-adlaw na pagtutudok kan mga tutors asin YDW.
Kaiba kanda Teacher Elvie asin Teacher Sharon sa mga maestro hale sa DepEd Schools Division Office kan Sorsogon City na nakakakita kan kagayon asin dakulang pakinabang kan programa.
Segun sainda, dakula an saindang kasadyaan ta an saindang eskwelahan sarong sa mga napili para sa Tara, Basa! huli ta dakulang tabang ini bako lang sa mga aki kundi pati man sa saindang mga magurang.
Higit sa pinansyal na tabang, nakikita man ninda an dakulang kontribusyon kaini sa paghasa kan kakayahan kan mga kolehiyong kalahok asin sa paghahanda sainda para sa saindang mapiling propesyon sa maabot na panahon.
An TBTP iyo an reformatted educational assistance program kan Department of Social Welfare and Development (DSWD) para sa mga financially disadvantaged college students. Ini sarong cash-for-work program kun sain an mga estudyante nagtatao nin serbisyo bilang tutors kan mga aki na nahihirapan sa pagbasa o kaya naman bilang Youth Development Workers (YDW) na nagpapadaloy nin parenting sessions para mapalawak an kaaraman kan mga magurang sa tama asin epektibong paggabay sa saindang mga aki.
Kasabay kan pagtatapos kan ikaduwang semana kan implementasyon kan Tara, Basa! sa rehiyon iyo man an pagbukas nin mas dakulang oportunidad bako lang para makakwarta kundi para makapagbahagi man nin kaaraman, inspirasyon, asin pag-asa lalo na sa mga pamilyang higit na nangangailangan.
Sa paglabay kan mga aldaw, mas nagdadakula an mga kwento nin pasasalamat asin pag-apresyar lalo na hale sa mga magurang na tunay na nakakarandam kan pagkamoot, pagkalinga, asin suporta na idinudulot kan programa.