Nagpabulig an usa nga nurse nga nabiktima hin aksidente ha kadalanan ha Brgy. Jubasan, Allen, Northern Samar, matapos gin-aaligar waray hiya masuportahan hin insakto an iya nagasto ha pagpapatambal ngan an adlaw nga waray hiya nakatrabaho tungod han insidente.
An biktima amo hi Arfe Abenir, 37 anyos, residente han Brgy. Buenavista, San Isidro, Northern Samar.
Base ha impormasyon tikang ha kapulisan, natabo an insidente dida han Mayo 17, kun diin nagmamaneho hi Abenir han iya motorsiklo ngan naagi ha nasabi nga lugar dida han natabo an aksidente.
Samtang gin-susulsog an dalan, usa nga van nga gintatag-iyahan hin usa nga Board Member ha Northern Samar ngan ginmamanehoan ni alyas “Jo,” residente han UEP, Catarman, an gin-aaligar tigda lumiko pa wala ngan waray magsenyas nga gintutuohan hinungdan han pagkabunggo han duha nga sarakyan.
Tungod han insidente, nag-angkon hin mga kasamdan ha lawas an nurse ngan gindara ha ospital para matambalan.
Sumala ha report, nagkasarabot anay an duha nga partido nga magse-settle ha police station, pero ginaligar nga waray makatuman an driver han van.
Han Mayo 20, usa nga tawo nga nagpakilala nga representante ni Board Member Nadia Ong an kumadto ha panimalay han biktima.
Didto, naghangyo hi Abenir hin kabaraydan para han iya waray pakasulod ha trabaho, gastos medikal, ngan danyos ha iya motorsiklo. Pero sumala ha iya, P5,000 la an ginhahatag nga kabaraydan tikang ha kampo han board member.
Waray sumugot an nurse ha nasabi nga kantidad tungod kay para ha iya, diri ini igo para mabayaran an iya ngatanan nga nagasto ngan perwisyo.
Ha kaluyo ng bahin, nagpagawas hin statement hi Board Member Nadia Ong, ngan gin siring nga waray nira pabay-i an biktima. Sumala ha iya, nagsugo hiya dayon nga tagan hin kinahanglanon nga bulig medikal an nurse samtang gin-aasikaso an insidente.
Source: RMN Tacloban