Padayun an gin bubuhat nga deradicalization program para ha mga anay miyembro han armado nga kagiusan didtu ha probinsya han Northern Samar.
Ha panguna ni 801st Infantry Brigade Commander BGen Carmelito Pangatungan ngan han Northern Samar Provincial Mobile Force Company Commander PLtCol Edwin Oloan Jr., gin buhat an deradicalization han sobra 30 nga kaparte han Batch 11 han mga anay New People’s Army nga namagsurrender ha mga miyembro ha piud han balaud.
Panuyo han deradicalization an mabuligan hira ha reintegration nira tibalik ha normal nga komunidad, paghatag hin intervention agud diri na hira utro mauwat ngan bumulig ha pakig bisug kontra ha gobyerno, ngan mapabaskug ngan mapakusog an sumpayan han tanan nga stakeholders samtang gin babalik an pagtuo han mga anay miyembro han NPA balik ha gobyerno.
Nagpapakita gihapun an programa han marig-on nga kolaborasyon han Philippine Army, Philippine National Police, ngan iba pa nga mga partner nga stakeholders para ha reintegrasyon, nga natutuk ha pag-intindi han mga eksperyensya han mga hadto anay myembro han NPA.
An mao nga pitad in kaparte gihapun ha padayon nga pagparig-on han pagsulong han permanente nga kamurayawan, ngan pagbulig ha mga anay membro han NPA nga mabalik an ira dignidad, ngan makasulod utro ha normal nga sosyedad nga puno hin paglaum tikadto hn maupay nga kinabuhi.
Kabulig gihapun han kasundaluhan ngan kapulisan ha pagpatuman han programa an buhatan han Provincial Social Welfare and Development Office han Provincial Government han Northern Samar.
Photo credit to 2nd NSPMFC
Source: #RMNTaclobanNews