Nagmalampuson ang gihimong anti-illegal drug operation sa City Drug Enforcement Team (CDET) sa Tagbilaran City Police Station nga miresulta sa pagkasikop sa usa ka High-Value Individual (HVI) niadtong gabii sa Mayo 8, 2026, didto sa Purok-3, Brgy. Dampas, Tagbilaran City.
Ang maong operasyon, nga gipahigayon ubos sa lig-on nga pagdumala ni PCOL PATRICIO C. DEGAY JR., Provincial Director sa Bohol Police Provincial Office (BPPO), miila sa suspek nga si alyas Nestor, 40-anyos.
Nasakmit gikan sa posisyon sa suspek ang tulo (3) ka sachet sa gituohang shabu nga adunay gibug-aton nga 56.9 grams. Sumala sa Standard Drug Price (SDP), ang maong kantidad moabot sa Php 386,920.00.
Ang malampusong buy-bust gipangunahan ni PLT GREG L. REYES, ubos sa direktang superbisyon ni PLTCOL JOEY MALARRE BICOY, OIC sa Tagbilaran City Police Station, sa pakig-alayon sa Philippine Drug Enforcement Agency (PDEA).
Gidayeg ni PCOL PATRICIO C. DEGAY JR. ang abilidad ug paspas nga lihok sa mga personahe sa Tagbilaran CPS. Matud pa niya, “Kining maong dakop usa ka dako nga lakang sa nagpadayon nga kampanya sa Bohol Police Provincial Office batok sa ilegal nga droga aron masiguro ang kaluwasan sa tibuok probinsya.”
Ang suspek karon anaa na sa kustodiya sa kapulisan alang sa tukmang dokumentasyon ug pasakahan og kasong paglapas sa Republic Act 9165 o ang Comprehensive Dangerous Drugs Act of 2002.