Calatrava, Negros Occidental- Sinampahan na ng Calatrava Municipal Police Station sa Negros Occidental ng kasong murder ang pitong miyembro ng New Peoples Army matapos paslangin ang isang Barangay Captain na si Benjamin Javoc sa Barangay Lalong sa bayan ng Calatrava nitong nakaraang buwan.
Ayon pa ni Police Lieutenant Judesses Catalogo, Public Information Officer ng Negros Occidental Police Provincial Office, na naisampa na ang kaso sa mga suspek sa Provincial Prosecutor’s Office nitong Setyembre 2.
“This is based on their declaration, wherein the suspects introduced themselves as members of the CPP-NPA, and also on the accounts of the witnesses in their affidavits,” saad pa niya.
Samantala hindi naman pinangalanan ni Catalogo ang pitong mga suspek bilang proteksyon na rin sa pamilya ng biktima, pati na rin sa mga saksi.
“The victim’s family fear for their lives. When these NPA members know they have been charged, they will go after our witnesses,” dagdag pa niya.
Si Javoc ang ikatlong pinaslang ng mga komunistang rebelde sa bayan ng Calatrava nitong Agosto lamang.
Ayon naman sa 79th Infantry Battalion (79IB), Philippine Army, ang nasabing mga kaso ng pagpatay ay isinasagawa ng mga natirang grupo ng nabuwag na NPA Northern Negros Front sa pamumuno ni Roger Fabellar alias “Arnel Tapang” or “Jhong,” residente ng Sitio Malig-on, Barangay Bandila sa karatig bayan ng Toboso.
Katuwang ng kapulisan sa pag-iimbestiga sa mga kaso ang 79IB, na nagbigay pa ng Php100,000 pabuya sa kung sino ang makapagbigay ng mahahalagang impormasyon upang tuluyan ng maaresto si Fabellar.
Ang mga awtoridad ay nagbigay din ng security assistance sa mga residente sa Barangay Lalong mula nang binaril ang kanilang kapitan sa kanyang pamamahay noong Agosto 26.