Suma total 494 nga mga estudyante ngan review takers tikang ha magkadiru-dilain nga mga campus han Eastern Samar State University ha probinsya han Sinirangan Samar an nakakarawat hin tag- Php 3,000 nga bulig pinansyal han gindumara nga Bulig Para Estudyante (BPE) payout kakulop, Enero 12, 2026 ha Provincial Capitol gym.
An Bulig Para Estudyante nga programa in usa nga insyatibo han gobyerno probinsyal han Sinirangan Samar nga may katuyuanan nga mabuligan an mga estudyante pinaagi hin one-time assistance ha usa ka semester.
Ha iya mensahe, iginpaabot ni Gov. RV Evardone an ira mga pitad nga ginbubuhat han gobyerno probinsyal para mas madali nga maipadangat an nasabi nga programa ha mga estudyante labi na hadton mga taga hirayo nga bungto sakob han probinsya.
Nagpaabot naman hin pasasalamat hi Albert Singson, usa nga education student tikang ha ESSU Main Campus ngan beneficiary han nasabi nga programa ha mga tawo nga napaluyo han BPE han ira pagduso han programa nga nakakabulig han mga estudyante ha ira mga panginahanglan ha pag-iskwela.
Source: #RMNTaclobanNews via Eastern Samar Provincial Information Office